رینجرز کو سندھ حکومت کے رحم و کرم پر نہیں چھوڑ سکتے : چوہدری نثار
و فاقی وزیر داخلہ چوہدری نثار نے کہا ہے کہ کراچی میں اس وقت رینجرز کی تعیناتی کو قانونی تحفظ حاصل نہیں ہے۔رینجرز کو سندھ حکومت کے رحم و کرم پر نہیں چھوڑ سکتے۔اسلام آباد میں پریس کانفرنس کے دوران ایک سوال پر انہوں نے کہا کہ سندھ حکومت اختیارات دینے پر راضی نہ ہوئی تو رینجرز کو واپس بلوا لیں گے۔واضح رہے کہ رینجرز کے اختیارات ختم ہوئے ایک دن گزر گیا ہے ، لیکن سندھ حکومت نے ابھی تک رینجرز کے اختیارات میں توسیع نہیں کی۔ محکمہ داخلہ سندھ نے رینجرز کے خصوصی اختیارات میں توسیع کی سمری پچھلے ہفتے منظوری کیلئے وزیر اعلیٰ سندھ کو بھیجی تھی جو ابھی تک منظور نہیں کی گئی۔ اگست میں رینجرز کو انسداد دہشت گردی ایکٹ کی شق 4 کے تحت 4 ماہ کیلئے خصوصی اختیارات دئیے گئے تھے۔ تب بھی سندھ حکومت کو تحفظات تھے مگر بعد میں منظوری دے دی گئی تھی۔ دوسری جانب انسداد دہشت گردی ایکٹ کے تحت رینجرز کو تلاشی، چھاپے، گرفتاری اور شر پسند عناصر کو کنٹرول کرنے کے لئے ہتھیار استعمال کرنے اور کسی ملزم کو 90 روز تک تفتیش کے لئے تحویل میں رکھنے کا اختیار دیا گیا۔ -
Post a Comment